“Isroil tarixida bunday yirik vayrongarchilik kuzatilmagan”

 

Isroil hukumati Eron bilan kechgan 12 kunlik harbiy to‘qnashuv natijasida mamlakat infratuzilmasiga yetkazilgan moddiy zarar miqdorini 10 milliard shekel (taxminan 3 milliard AQSh dollari) deb baholadi. Bu haqda Bloomberg agentligi Moliya vazirligi va Isroil soliq xizmati ma’lumotlariga tayanib xabar berdi.

 

Ma’lum qilinishicha, ajratiladigan mablag‘lar asosan raketalar natijasida zararlangan binolarni ta’mirlash hamda tadbirkorlik subyektlariga tovon to‘lash uchun yo‘naltiriladi.

 

“Bu — biz tarixda guvoh bo‘lgan eng jiddiy vayronagarchilik. Isroil tarixida bunday miqyosdagi zarar kuzatilmagan”, — deya ta’kidladi soliq idorasi vakili Shay Aaronovich.

 

Shu bilan birga, hisob-kitoblar faqat ko‘rinadigan zararlarni, ya’ni binolar va faoliyat yurituvchi infratuzilmaning buzilishlarini o‘z ichiga oladi. Vaholanki, foydalanilgan qurol, raketa va havo mudofaa tizimlarini yangilash xarajatlari bu summaga kiritilmagan.

 

Isroil moliya vaziri Bezalel Smotrich mojaroga doir umumiy harbiy va iqtisodiy xarajatlar 12 milliard dollarga yetishi mumkinligini aytgan bo‘lsa, Isroil Markaziy banki rahbari Amir Yaron bu ko‘rsatkichni 6 milliard dollar deb taxmin qilgan.

 

Mojaro davomida Isroilda hayotiy muhim xizmatlardan tashqari barcha maktab va ishxonalar yopilgan. Markaziy Isroil va Tel-Aviv aglomeratsiyasi singari zich aholi yashaydigan hududlar asosiy nishonlardan biriga aylangan.

 

Zarar ko‘rgan muhim obyektlar orasida mamlakatdagi eng yirik ilmiy markaz — Veyzman instituti, Hayfa neftni qayta ishlash zavodi va Isroil janubidagi shifoxonalardan biri ham bor.

 

Isroil rasmiylari ma’lumotiga ko‘ra, mojaro davomida 28 kishi halok bo‘lgan, 1300 dan ortiq fuqaro jarohat olgan. Eron esa o‘z navbatida 627 kishi qurbon bo‘lganini da’vo qilmoqda.

 

Garchi Isroil eng ilg‘or havo hujumidan mudofaa tizimlariga ega bo‘lsa-da, raketalarning 10–15 foizini to‘liq to‘xtatib qolish imkonsiz bo‘lgan. Ballistik raketalar katta hajmda vayronagarchilik keltirgan.

 

Mojaro 13-iyun kuni Isroil tomonidan Eronga qarshi ilk dron va raketa hujumi bilan boshlangan va 24-iyun kuni AQSh prezidenti Donald Tramp vositachiligida e’lon qilingan sulh bilan yakunlangan.