“O‘g‘irlagan pullaringni o‘n barobar qilib qaytarasanlar”

 

Qirg‘iziston Prezidenti Sadir Japarov mamlakatdagi korrupsiya holatlari yuzasidan davlat xizmatida ishlayotganlarga qat’iy murojaat bilan chiqdi. Bu haqda u o‘zining ijtimoiy tarmoqlardagi sahifasida e’lon qilgan bayonotida ma’lum qildi.

 

Prezidentning so‘zlariga ko‘ra, 2025-yilning sentabr oyidan boshlab davlat byudjeti hisobidan moliyalashtirilgan loyihalar – jumladan qurilish ishlari va asfalt yo‘llarni o‘z ichiga olgan tekshiruvlar boshlanadi. Bu ishlarni amalga oshirish uchun mutaxassislar ishtirokida respublika miqyosida komissiyalar tuziladi.

 

“Kim davlat mablag‘ini o‘zlashtirgan bo‘lsa, o‘g‘irlangan summaning o‘n baravarini qaytaradi va jazoga tortiladi. Bu jarayonni bevosita o‘zim nazorat qilaman. Lavozimi, kimligi, mansabdorligi muhim emas – qonun barchaga barobar”, — dedi Japarov.

 

Shuningdek, Prezident halol mehnat evaziga olinadigan rasmiy maoshdan norozilarni davlat xizmatidan ketib, xususiy tadbirkorlik bilan shug‘ullanishga da’vat etdi.

 

“Oldingi davrlar tugadi. Endi kim nimani qilayotganini aniqlaymiz. Davlat sizga ishonib topshirgan mablag‘lar talon-toroj qilinishiga yo‘l qo‘ymaymiz”, — deya qo‘shimcha qildi u.