Tramp Nyu-York meri bo‘lishi kutilayotgan musulmon nomzodni haqorat qildi
33 yoshli Zohran Mamdani Nyu-York merligi uchun dastlabki saylovlarda g'alaba qozongan.
Donald Tramp Nyu-York meri lavozimi uchun demokratlar safidan ilgari surilgan nomzod Zohran Mamdani haqida ijtimoiy tarmoqlarda keskin fikr bildirdi. U Truth Social platformasida e’lon qilgan postida Mamdani haqida “100 foiz aqldan ozgan kommunist” degan iborani ishlatdi.
“Nihoyat, demokratlar chiziqni kesib o‘tishdi. 100 foiz aqldan ozgan kommunist Zohran Mamdani Dempartiyaning boshlang‘ich bosqichida g‘alaba qozondi va endi shahar meri bo‘lish arafasida. Oldin ham radikal chaplar bo‘lgan, lekin bu safar bu holat kulgili tus oldi”, — deya yozdi Tramp.
Ma'lum qilinishicha, 33 yoshli demokratik sotsialist Zohran Mamdani seshanba kuni kechqurun Nyu-York merligi uchun dastlabki saylovda g‘alaba qozonganini e’lon qilgan. U ilgari Nyu-York shtati gubernatori bo‘lgan Endryu Kuomo iste’foga chiqqanidan so‘ng siyosiy maydonga faol kirib kelgan.
Biroq, saylov natijalarining yakuniy holati hali reytingli ovoz berish tizimi orqali aniqlanadi. Agar natijalar tasdiqlansa, Mamdani Nyu-York tarixidagi birinchi musulmon va hind-amerikalik mer bo‘ladi.
Ekspertlar ta’kidlashicha, liberal kayfiyat kuchli bo‘lgan Nyu-Yorkda partiya ichidagi boshlang‘ich saylovlar ko‘pincha noyabr oyidagi yakuniy saylov natijasini belgilab beradi.
Ma’lumot uchun, hozirda Nyu-York shahar meri lavozimini Erik Adams egallab turibdi. U 2022-yil yanvar oyidan buyon shahar rahbari hisoblanadi va 110-mer sifatida faoliyat yuritmoqda.
