Microsoft 40 yil ichida birinchi marta Windows ekranini o‘zgartiradi
1985-yildan beri mavjud bo‘lgan ko‘k ekran kompyuter tizimi jiddiy xatoga uchraganida foydalanuvchiga xabar beruvchi signal edi.
Microsoft 40 yildan beri Windows tizimida ishlatilgan mashhur “Ko‘k o‘lim ekrani”ni (BSOD) yangilab, endi uni “Qora o‘lim ekrani” bilan almashtirishini e’lon qildi. Yangi o‘zgarish Windows 11’ning 24H2 versiyasidan boshlab joriy etiladi. Bu haqda MSN xabar berdi.
1985-yildan beri mavjud bo‘lgan ko‘k ekran kompyuter tizimi jiddiy xatoga uchraganida foydalanuvchiga xabar beruvchi signal edi. Uning so‘nggi yillarda mashhur bo‘lgan versiyasida g‘amgin emotikon :( ham paydo bo‘lgan edi.
Yangi qora ekran avvalgidek xato kodi va nosoz drayver haqidagi ma’lumotlarni ko‘rsatadi, ammo bu safar tizimni tiklash tezligi sezilarli darajada oshadi. Microsoft bu o‘zgarishni “Windows Resiliency Initiative” doirasida amalga oshirmoqda.
Bu tashabbus 2024-yilda yuz bergan CrowdStrike’ning global nosozligidan so‘ng ishga tushirilgan bo‘lib, tizim ishonchliligini oshirish va foydalanuvchilar uchun muammolarni tezroq bartaraf etishni maqsad qilgan.
