Qozog‘istonda ayol farzandini avtobus bekatida dunyoga keltirdi
Ona bo‘lgan ayol va bolaga zudlik bilan yordam ko‘rsatildi.
Qozog‘istonning Karaganda shahrida ayol avtobus bekatida kutilmaganda farzandko‘rdi. Bu haqda Karaganda.kz axborot portali xabar bermoqda.
Hodisa shaharning janubi-sharqiy tumanidagi “TBS” avtobus bekatida sodir bo‘lgan. Mahalliy fuqarolar tomonidan chaqirilgan tez tibbiy yordam xodimlari ona va chaqaloqni viloyat klinik kasalxonasining perinatal markaziga yetkazgan.
Rasmiy ma’lumotlarga ko‘ra, tug‘uruq homiladorlikning 34-haftasida, bekat hududida, ayol avtobus kutayotgan paytda sodir bo‘lgan. Tibbiyot xodimlarining fikricha, tug‘uruq juda tez kechgani sababli ayol tug‘uruqxona yetib borishga ulgurmagan.
Ayni paytda onaning ahvoli barqaror deb baholanmoqda. Muddatidan oldin tug‘ilgan chaqaloq esa reanimatsiya bo‘limida, holati og‘ir deb xabar berilmoqda.
