Qozog‘istonda prezident topshirig‘i asosida jurnalistlarga yangi uylar berildi
Qozog‘istonda bu an’ana 3 yildan beri davom etib kelmoqda.
2025-yil 28-iyun kuni Ostona shahrida Qozog‘istonda Ommaviy axborot vositalari (OAV) xodimlari kuni munosabati bilan tantanali tadbir bo‘lib o‘tdi. Unda Prezident Qosim Jo‘mart To‘qaev tashabbusi bilan tashkil etilgan “Dara” fondi tomonidan jurnalistlar va boshqa media sohasi vakillariga 66 ta yangi uy topshirildi.
“Dara” fondining ma’lum qilishicha, uy-joy bilan ta’minlash tashabbusi mamlakatda ijtimoiy barqarorlikni mustahkamlash va fuqarolarning farovonligini oshirishga qaratilgan davlat siyosatining muhim qismi sanaladi.
So‘nggi uch yil ichida:
2023-yilda 65 nafar OAV xodimiga bepul mulk topshirildi;
2024-yilda — 68 ta;
2025-yilda esa — 66 nafar jurnalist va media mutaxassisi yangi uylarga ega bo‘ldi.
Tadbirda Prezident matbuot kotibi, maslahatchi Ruslan Jeldibay ham so‘zga chiqib, bayram bilan tabriklab shunday dedi: “Prezident To‘qaev topshirig‘i asosida uchinchi yildirki, bu an’ana davom etmoqda. Bu davlat rahbarining mahalliy OAVga bo‘lgan doimiy e’tibori va e’tirofidir. Bu yilgi uylar nafaqat jurnalistlarga, balki rejissyorlar, operatorlar, korrektorlarga ham topshirildi. Shuningdek, ko‘p farzandli va nogiron farzand tarbiyalayotgan oilalarga ham alohida e’tibor qaratildi”.
Uy-joy sertifikatlari davlat va xususiy OAV vakillariga topshirilgan bo‘lib, ular orasida muharrirlar, kameramanlar, ssenariy mualliflari, texnik mutaxassislar hamda tajribali jurnalistlar mavjud.
