AQShda siyosiy sulola davri boshlanadimi?

 

AQSh prezidenti Donald Trampning o‘g‘li — Erik Tramp kelajakda o‘zi yoki oilaning boshqa a’zosi prezidentlikka nomzodini qo‘yishi mumkinligini istisno etmadi. Bu haqda u Financial Times nashriga bergan intervyusida so‘z ochdi deb yozadi oxu.az nashri.

 

“Men bugungi siyosatchilarning yarmidan hayratga tushmayman. Ishonchim komilki, o‘zim ancha yaxshi ish qila olaman”, — deydi 41 yoshli Erik Tramp. Biroq u shu bilan birga, siyosiy lavozim egallash istagi bor-yo‘qligi haqida qat’iy fikrga kelmaganini ham tan oldi.

 

"Farzandlarim so‘nggi 10 yil ichida biz boshdan kechirgan tajribani boshlaridan kechirishsin, deb istarmidim? Bu oson savol emas. Ha deb javob bergan taqdirimda ham, siyosat yo‘liga kirish faqat menga emas, boshqa oila a’zolariga ham tegishli bo‘lishi mumkin”, — dedi u.

 

Hozirda Erik Tramp Tramp Organization kompaniyasining vitse-prezidenti hisoblanadi. U otasi Donald Tramp biznesni amalda boshqarmayotganini, barcha e’tiborini “uchinchi jahon urushining oldini olish”ga qaratganini aytib o‘tdi. “Agar otam prezidentlikka nomzodini qo‘ymaganida, ehtimol, oilamiz boyligi bugun undan ham katta bo‘lardi”, — dedi u.

 

Ma’lumot uchun, Donald Trampning jami besh farzandi bor: Donald Jr., Ivanka, Erik, Tiffani va Barron. Shuningdek, u hozirda 11 nafar nabiraning bobosi hisoblanadi.

 

Donald Tramp o‘zi ham uchinchi bor prezidentlik uchun kurashishi mumkinligini bir necha marta tilga olgan. Biroq AQSh Konstitutsiyasiga ko‘ra, bir kishi ikki muddatdan ortiq prezident bo‘lishi mumkin emas.