“Eronning Qatarga hujumi Fors ko‘rfazi davlatlari obro‘siga putur yetkazdi”
BAA prezidentining diplomatik maslahatchisi Qatardagi harbiy bazaga uyushtirilgan hujumni keskin qoraladi.
Birlashgan Arab Amirliklari (BAA) prezidentining diplomatik maslahatchisi Anvar Gargash Eron tomonidan Qatardagi Al-Udeyd harbiy bazasi hududiga uyushtirilgan hujumni keskin qoraladi. Bu haqda “TASS” agentligi xabar berdi.
Gargashning so‘zlariga ko‘ra, Eronning bu harakati nafaqat Qatar suverenitetini buzgan, balki butun Fors ko‘rfazi davlatlarining ishonchi va obro‘siga putur yetkazgan. U hujumni mintaqa xavfsizligi uchun jiddiy tahdid deb baholadi.
BAA rasmiysi arab monarxiyalari Isroil va Eron o‘rtasidagi ehtimoliy urushga nisbatan qat’iy va aniq pozitsiyada turganini ta’kidladi. Shunga qaramay, Eronning Qatar hududiga qilgan hujumi mintaqaviy barqarorlikka xavf solganini bildirdi.
Uning fikricha, bunday harakatlar Fors ko‘rfazi davlatlari o‘rtasidagi birdamlikka putur yetkazadi va diplomatik yo‘l bilan hal qilinishi kerak bo‘lgan masalalarni yanada keskinlashtiradi.
