Germaniya va Isroil kiberxavfsizlikda strategik ittifoq tuzmoqda
“Kiber gumbaz” - Germaniya va Isroildan yangi xavfsizlik tashabbusi.
Germaniya xavfsizlik sohasidagi hamkorlikni kuchaytirish maqsadida Isroil bilan yangi “Kiber gumbaz” tizimini yaratishni rejalashtirmoqda. Bu haqda Bild nashri xabar berdi.
Germaniya ichki ishlar vaziri Aleksandr Dobrinadt Eron-Isroil o‘rtasidagi 12 kunlik keskin qarama-qarshilikdan so‘ng Tel-Avivga tashrif buyurgan ilk yuqori martabali Germaniya siyosatchisi bo‘ldi. Germaniya IIV bu tashrifni Isroilga birdamlik ifodasi va yangi strategik aloqalarni yo‘lga qo‘yish yo‘lidagi muhim qadam deb atadi.
Dobrinadt tashrifi davomida ikki davlat o‘rtasida kibermudofaa va dronlarga qarshi texnologiyalar sohalarida hamkorlikni kengaytirish bo‘yicha rejalarni e’lon qildi. Unga ko‘ra:
Germaniya-Isroil kiber tadqiqot markazi tashkil etiladi;
Kiberxavfsizlik bo‘yicha tajriba almashinuvi yo‘lga qo‘yiladi;
Dronlarga qarshi zamonaviy mudofaa tizimlari ishlab chiqiladi;
“Kiber gumbaz” deb ataluvchi raqamli himoya tizimi yaratiladi.
Bu tashabbus xavfsizlik tahdidlari ortib borayotgan bir paytda ikki davlat o‘rtasidagi texnologik va strategik sheriklikni mustahkamlashga xizmat qilishi kutilmoqda.
