Italiyada jazirama sababli “qizil” ogohlantirish e’lon qilindi
Ekstremal issiqlik to‘lqini 21 ta shaharga xavf tug‘dirmoqda.
Italiyaning ko‘plab shaharlarida hafta oxirida kutilayotgan ekstremal issiqlik sababli sog‘liq uchun eng yuqori xavf darajasini anglatuvchi “qizil” ogohlantirish e’lon qilindi. Bu haqda “Anadolu” agentligi xabar berdi.
Sog‘liqni saqlash vazirligi aholiga jaziramadan ehtiyot bo‘lishni tavsiya qilmoqda. Ankona, Milan, Rim, Florensiya, Neapol kabi yirik shaharlarda 28-iyun kuni ogohlantirish berilgan bo‘lsa, 29-iyun kuni Kataniya, Rieti va yana bir nechta shaharda xavf kuchayishi kutilmoqda. Jami 21 ta shahar ogohlantirish ostida.
Mutaxassislar fikricha, bu darajadagi issiq faqat bolalar va keksa odamlarga emas, balki sog‘lom insonlarga ham xavf tug‘diradi. Vaholanki, harorat normadan ancha yuqori bo‘lishi kutilmoqda.
AQSHda ham jazirama oqibatida o‘nlab insonlar jabrlangan. 23-iyun kuni ochiq havodagi tadbirdan so‘ng 150 dan ortiq odamning ahvoli og‘irlashgan. Issiqlik to‘lqini Kanada hududlariga ham ta’sir ko‘rsatgan.
