Rossiyada yangi tendensiya: boy oilalar farzandlari uchun xitoylik enagalarni yollamoqda
Putin nabirasi xitoy tilida bemalol so‘zlasha olishini bildirdi.
Rossiyada boy va ta’limga e’tiborli oilalar farzandlariga xitoy tilini o‘rgatish uchun endi tobora ko‘proq xitoylik enagalarni yollamoqda. Bu haqda The New York Times nashri English Nanny agentligi asoschisi Valentin Gogolga tayanib xabar berdi.
Uning aytishicha, xitoy tilida so‘zlashuvchi enagalarga talab hozirda ingliz tilidagilardan keyin ikkinchi o‘ringa chiqib olgan, hatto fransuz tilidagilardan o‘zib ketgan. Talab shunchalik yuqoriki, English Nanny kompaniyasi bu ehtiyojni qondirish uchun barcha resurslarini safarbar qilmoqda.
Xitoylik enagalarning oylik maoshi 5000 dollargacha yetadi. Bunday yondashuv — ya’ni bolalikdan boshlab xitoy tilini o‘rgatish — Rossiyadagi elit qatlam orasida ommalashmoqda. English Nanny mijozlarining ko‘pchiligi endi xitoy tilini ingliz tilidan keyingi eng muhim xorijiy til sifatida ko‘rmoqda.
NYT bu tendensiyani Rossiyada kuzatilayotgan umumiy “xitoylashish” jarayonining bir bo‘lagi sifatida baholaydi. Mamlakatda xitoy tiliga, Xitoyda tahsil olishga, madaniyati va mahsulotlariga bo‘lgan qiziqish sezilarli darajada ortgan.
Prezident Vladimir Putin ham bu boradagi o‘z tajribasini bo‘lishgan. U nabirasining xitoy tilida bemalol suhbatlasha olishini aytib, uning Pekinlik enaga yordamida tilni mukammal o‘rganayotganini ta’kidlagan edi.
G‘arb madaniyati va qadriyatlariga ko‘r-ko‘rona ergashish davri ortda qolmoqda. Endilikda Xitoy madaniyatiga yaqin bo‘lish, xitoy tilini bilish Rossiyada yangi moda va maqsadga aylangan.
