Sun’iy intellekt sabab, Britaniya yoshlari uchun ish imkoniyatlari qisqarmoqda
ChatGPT global miqyosda ishsizlik darajasini 10–20 foizga oshirishi mumkin.
2022-yil noyabr oyida sun’iy intellekt asosida yaratilgan ChatGPT platformasining ommaga taqdim etilishi Buyuk Britaniya mehnat bozorida jiddiy o‘zgarishlarga olib keldi. The Guardian gazetasi ma’lumotlariga ko‘ra, ayniqsa yosh mutaxassislar uchun ish o‘rinlari deyarli uchdan bir qismga qisqargan.
Raqamlarga ko‘ra, hozirda mamlakatdagi boshlang‘ich darajadagi ish o‘rinlari umumiy ish bozorining atigi 25 foizini tashkil qilmoqda. 2022-yilda bu ko‘rsatkich 28,9 foiz edi. Eng keskin pasayish chakana savdo sohasida kuzatilgan — bu yo‘nalishda yoshlar uchun ish o‘rinlari soni 78 foizga kamaygan. IT sohasida 55 foiz, buxgalteriya va moliyada esa 51 foiz pasayish qayd etilgan.
Bunga asosiy sabab sifatida kompaniyalarning oddiy, ko‘p malaka talab qilmaydigan vazifalarni bajarishda endi amaliyotchilar yoki yangi bitiruvchilarni emas, balki sun’iy intellekt vositalarini tanlayotgani ko‘rsatilmoqda. Aynan shu omil bitiruvchilar va talabalarga ish topishni yanada mushkullashtirgan.
Anthropic kompaniyasi rahbari Dario Amodei esa vaziyat yanada og‘irlashishini bashorat qilmoqda. Uning so‘zlariga ko‘ra, yaqin 5 yil ichida sun’iy intellekt texnologiyasi ofis ishlarining yarmidan ko‘pini avtomatlashtirib, global miqyosda ishsizlik darajasini 10–20 foizga oshirishi mumkin.
