Trampning sud da’vosi bo‘yicha Paramount kompaniyasi tovon puli to‘laydi
Trampning Kamala Xarris intervyusiga oid da’vosi 16 million dollarga hal etiladi.
Paramount kompaniyasi AQSh prezidenti Donald Trampning Kamala Xarris bilan CBS telekanali orqali efirga uzatilgan intervyusiga oid da’vosini hal qilish uchun 16 million dollar to‘lashga rozi bo‘ldi. Bu haqda point.md nashri xabar bermoqda.
Xabarga ko‘ra, Tramp CBS News telekanalini “60 daqiqa” dasturidagi Kamala Xarris bilan bo‘lgan intervyuni to‘liq, tahrir qilinmagan shaklda efirga uzatmaslikda ayblagan va bu orqali saylov jarayoniga aralashganlikda ayblab, dastlab 10 milliard dollar miqdorida da’vo arizasi kiritgan. Keyinchalik Tramp da’vo summasini 20 milliard dollarga oshirgan.
Iyun oyi oxirida The Wall Street Journal nashri vositachilar ishtirokida sud jarayonini 20 million dollarlik kelishuv orqali hal qilish taklifi bildirilgani haqida xabar bergan edi.
Paramount va Tramp o‘rtasidagi yakuniy kelishuvga ko‘ra, kompaniya 16 million dollar to‘lash orqali da’voni tugatishga rozi bo‘ldi. Mazkur kelishuv hali rasman sud tomonidan tasdiqlanmagan bo‘lsa-da, tomonlar mojaroni murosali tarzda hal etishga yaqin turibdi.
