AQSH Xitoyga chip texnologiyasi eksportidagi cheklovlarni bekor qildi
Synopsys, Cadence va Siemens’ga Xitoy bozoriga kirish uchun ruxsat berildi.
AQSH Xitoyga chip ishlab chiqish uchun zarur bo‘lgan dasturlar eksportiga qo‘yilgan cheklovlarni bekor qildi. Bu haqda Bloomberg nashriga tayanib kommersant.ru xabar berdi.
Xususan, Donald Tramp ma’muriyati davrida Xitoyga EDA (Electronic Design Automation) dasturlarini — ya’ni chip loyihalash tizimlarini eksport qilish uchun joriy etilgan litsenziya talablariga endi ehtiyoj qolmaydi.
AQSH Savdo vazirligi bu o‘zgarish haqida Synopsys, Cadence hamda Siemens kabi yetakchi texnologik kompaniyalarga rasmiy ravishda ma’lum qilgan. Siemens allaqachon Xitoydagi faoliyatini qayta tiklagan bo‘lsa, qolgan kompaniyalar ham eksport jarayonini yo‘lga qo‘yish bosqichida.
Mazkur choralar AQSH va Xitoy o‘rtasida erishilgan yangi savdo kelishuvi doirasida amalga oshirilmoqda va texnologik cheklovlarni yumshatishga qaratilgan. AQSH, o‘z navbatida, Xitoydan nodir yer elementlari va boshqa muhim minerallar eksportini jadallashtirishni talab qilmoqda.
Ma’lumot uchun, avvalgi eksport cheklovlari aynan Xitoy tomonidan nodir yer elementlarining yetkazib berilishi cheklangani ortidan joriy etilgan edi. Endilikda esa tomonlar o‘zaro savdoni tiklash va muhim texnologiyalar almashinuvida muvozanatli yondashuvga erishishga intilmoqda.
