Yaponiyani mega-zilzila qoplashi mumkin: hukumat ogohlantirmoqda
Zilzila xavfini inobatga olgan Yaponiya hukumati favqulodda vaziyatlar rejasini yangiladi.
Yaponiya hukumati halokatli zilzila xavfi haqida aholiga rasman murojaat qildi. Asahi gazetasining yozishicha, hukumat ekspertlari yaqin 30 yil ichida mamlakat janubi-g‘arbiy qirg‘og‘ida joylashgan “Nankai xandagi”da 8 dan 9 ballgacha bo‘lgan kuchli zilzila sodir bo‘lish ehtimoli 75–82 foizni tashkil etishini ma’lum qilgan deydi oxu.az nashri.
Ushbu suv osti yorig‘i yirik sunami to‘lqinlariga sabab bo‘lishi mumkin. Taxminlarga ko‘ra, to‘lqinlarning balandligi ba’zi hududlarda 20 metrgacha yetadi. Eng ko‘p zarar Osaka, Vakayama, Kumamoto va Miyazaki prefekturalariga yetishi kutilmoqda.
Zilzila xavfini inobatga olgan Yaponiya hukumati favqulodda vaziyatlar rejasini yangiladi. Unga ko‘ra, qo‘shimcha to‘g‘onlar, himoya inshootlari qurilishi va aholi uchun evakuatsiya boshpanalari barpo etilishi rejalashtirilgan.
Yaponiyada zilzilalar odatiy hodisa hisoblanadi. Faqatgina iyun oyida mamlakat janubida 474 ta zilzila qayd etilgan bo‘lib, ulardan birining magnitudasi 5.1 ga yetgan.
