Daniya politsiyasi bolalar bilan onlayn o‘yin o‘ynab, jinoyatchilikka qarshi kurashmoqda

Daniya politsiyasi yoshlar orasida keng tarqalgan onlayn jinoyatlarga qarshi kurashish uchun yangi, innovatsion yondashuvni qo‘llamoqda. “Politiets Online Patrulje” nomli maxsus guruh bolalar bilan onlayn o‘yinlar orqali muloqot qilib, firibgarlik va jinsiy zo‘ravonlikka qarshi profilaktika ishlarini olib bormoqda. Bu haqda Euronews nashri xabar berdi.

 

Politsiya serjanti Jeppe Torupning so‘zlariga ko‘ra, internet jinoyatchiligi shakllari tobora murakkablashmoqda va ularni aniqlashda texnologik bilimlar muhim rol o‘ynamoqda.

 

“Til to‘siqlari yo‘qligi va davlat chegaralari osonlik bilan chetlab o‘tilishi jinoyatni onlayn tarzda sodir etishni osonlashtiradi. Biz bu borada doimo hushyor bo‘lishimiz kerak”, — dedi Torup.

 

Guruh a’zolari Discord, Facebook, Instagram va TikTok kabi mashhur platformalarda faoliyat olib boradi. Ular o‘yin orqali bolalar bilan ishonchli muloqot o‘rnatadi va ularni ehtimoliy xavf-xatarlardan ogohlantiradi.

 

2022-yilda tashkil etilgan mazkur guruh bugungi kunga qadar 787 mingdan ortiq obunachiga ega. 2024-yil oktabr oyiga kelib, ular tomonidan 260 ga yaqin tergov ishi ochilgan.

 

Politsiya vakili Sisse Birkebek bu tashabbus zarur ekanini ta’kidladi:

 

“Daniyadagi bolalarning 99 foizi har kuni internetdan foydalanadi. Shuning uchun biz ham ular bilan bir joyda, ya’ni internetda bo‘lishimiz kerak.”

 

Guruh “operatsion markaz”da ishlaydi — bu yerda zamonaviy o‘yin kompyuterlari, striming uskunalari, shuningdek TikTok kontenti tayyorlash uchun sharoitlar mavjud.

 

Mutaxassislarning fikricha, bu kabi yondashuv nafaqat jinoyatlarning oldini olish, balki bolalarning raqamli makonda o‘zini xavfsiz his qilishini ta’minlashda ham muhim ahamiyatga ega.