Rossiya Tolibon hukumatini rasman tan oldi
Moskva shahridagi Afg‘oniston elchixonasiga Tolibon tomonidan joriy etilgan yangi davlat bayrog‘i o'rnatildi.
Rossiya Tashqi ishlar vazirligi TASS agentligiga bergan ma’lumotiga ko‘ra, Moskva Afg‘onistonda hokimiyat tepasiga kelgan Tolibon tuzgan Islom Amirligini rasman tan oldi. Bu qaror TIV rahbari Sergey Lavrovning tavsiyasi asosida Prezident Vladimir Putin tomonidan qabul qilingan.
Rossiyaning Afg‘onistondagi maxsus vakili Zamir Kabulovning so‘zlariga ko‘ra, bu tan olish — Moskvaning Kobul bilan rasmiy muloqotni yo‘lga qo‘yish istagini ko‘rsatadi. Kreml ushbu qadami bilan Tolibon hukumatini xalqaro miqyosda legallashtirish tomon muhim qadam tashladi.
Shu bilan birga, bugundan boshlab Moskva shahridagi Afg‘oniston elchixonasida Tolibon tomonidan joriy etilgan yangi davlat bayrog‘i hilpiramoqda. Bu ramziy o‘zgarish Afg‘onistonning Rossiyadagi diplomatik maqomini ham yangilanishiga ishora qiladi.
Rossiyaning ushbu qarori xalqaro hamjamiyatda turlicha munosabat uyg‘otmoqda. Ko‘plab davlatlar Tolibon hukumatini tan olishdan hanuz tiyilayotgan bir vaqtda, Moskvaning bu qadami mintaqaviy siyosatdagi muhim burilish sifatida baholanmoqda.
