Amerikalik shifokor robot orqali bemorni masofadan operatsiya qildi
Operatsiya davomida bemordagi o‘simta muvaffaqiyatli olib tashlangan.
Amerikaning Florida shtatida yashovchi shifokor Vipul Patel angolalik 67 yoshli bemor Fernando da Silvaga masofadan turib robot yordamida operatsiya o‘tkazdi. Mart oyida unga prostata bezi saratoni tashxisi qo‘yilgan, iyun oyida esa o‘simta muvaffaqiyatli olib tashlandi.
Patel – Orlando shahridagi Advent Health markazining Global Robotic Institute tibbiy direktori hisoblanadi. U ushbu operatsiyani transkontinental robotlashtirilgan tizim orqali amalga oshirdi, deb xabar berdi ABC News.
Ushbu texnologiya tufayli shifokorlar minglab kilometr masofada joylashgan bemorlarga ham jarrohlik amaliyotlarini bajara olishmoqda. Patelning aytishicha, bu Afrikadagi saraton bemorlari uchun katta imkoniyat yaratadi.
"Avvallari bu hududlarda na yetarli monitoring, na davolash imkoniyatlari bo‘lgan," – deydi Patel. Endilikda esa ilg‘or texnologiyalar yordamida masofaviy amaliyotlar orqali bemorlarga umid bag‘ishlash mumkin bo‘lmoqda.
