HAMAS AQSh tinchlik rejasiga ijobiy javob berdi
Biroq reja rasman qabul qilingani noma'lum.
BBC xabariga ko‘ra, HAMAS harakati AQSh tomonidan taklif etilgan so‘nggi sulh rejasiga "ijobiy javob" berganini bildirgan. Bu reja G‘azo sektorida o‘t ochishni to‘xtatish va garovga olinganlarni ozod qilishni ko‘zda tutadi.
HAMAS bayonotida harakat “yangi muzokaralar bosqichini darhol boshlashga jiddiy tayyor” ekanligini ma’lum qilgan. Biroq u AQSh takliflarini rasman qabul qilganini tasdiqlamagan.
Avvalroq AQSh prezidenti Donald Tramp HAMASdan sulh bo‘yicha bir kun ichida javob kutayotganini aytgan edi. Trampga ko‘ra, Isroil urushni yakunlash uchun zarur shartlarni qabul qilgan va buning asosida 60 kunlik o‘t ochishni to‘xtatish rejimi e’lon qilinishi mumkin.
Reja doirasida:
Garovdagi 10 nafar tirik isroillik bosqichma-bosqich ozod qilinadi;
18 nafar halok bo‘lganlar jasadlari topshiriladi;
Isroil o‘z qamoqxonalaridagi ayrim falastinlik mahbuslarni ozod etadi.
Hozirda G‘azo sektorida 50 nafar isroillik garovda saqlanayotgani aytilmoqda, ulardan 20 nafari tirik bo‘lishi taxmin qilinmoqda.
HAMASning asosiy talablaridan biri — G‘azoga ozuq-ovqat va tibbiy yordamni to‘sqinliksiz yetkazish imkonini berishdir. AQSh takliflarida bu borada BMT va Qizil Xoch yordamida yetarli gumanitar yordam yetkazilishi nazarda tutilgan.
Shuningdek, reja Isroil qo‘shinlarining G‘azo hududining ayrim qismlaridan bosqichma-bosqich chiqishini ko‘zda tutadi.
Biroq HAMAS uchun muhim shartlardan biri shuki, 60 kunlik sulh yakunlangach, Isroil harbiy amaliyotlarni qayta boshlamasligi kafolatlanishi lozim.
