Iqtisodiyotni jonlantirish maqsadida Janubiy Koreyada pul tarqatiladi
Koreyada har bir fuqaro uchun moliyaviy yordam dasturi boshlandi.
Janubiy Koreya hukumati ichki iste’molni rag‘batlantirish va milliy iqtisodiyotni jonlantirish maqsadida har bir fuqaroga 150 000 von (taxminan 110 AQSh dollari) miqdorida bir martalik moliyaviy yordam puli ajratilishini e’lon qildi.
The Korea Herald nashriga tayanib Oxu.Az xabar berishicha, ushbu to‘lovdan mamlakatda 2025-yil 18-iyunga qadar doimiy yashagan barcha Janubiy Koreya fuqarolari foydalana oladi. Mazkur sana — dastur rasman e’lon qilingan kundan bir kun avvalga to‘g‘ri keladi.
Moliyaviy yordam faqat fuqarolarga emas — doimiy yashovchilar, nikoh asosida ko‘chib kelgan immigrantlar hamda rasmiy ravishda qochqin maqomini olgan shaxslar ham ushbu dasturdan foydalanish huquqiga ega.
Biroq xorijlik fuqarolar, ya’ni vaqtincha yashovchilar yoki ishchi vizasi bilan mamlakatda bo‘lganlar to‘lov olish imkoniyatiga ega emas.
