Yaponiya Filippinga 6 ta harbiy kema beradi
Tokio Manilaga strategik ko‘mak ko‘rsatmoqda.
Yaponiya Janubiy Xitoy dengizida kuchlar muvozanatini saqlab qolish maqsadida Filippinga o‘z flotidagi 6 ta eskirgan, ammo xizmatga yaroqli harbiy kemani — esminetslarni topshirishini rasman e’lon qildi. Bu qaror Xitoyning mintaqadagi harbiy faolligi ortib borayotgan bir paytda qabul qilindi.
Yaponiya Tashqi ishlar va Mudofaa vazirliklari ushbu qadamni "mintaqaviy xavfsizlikka hissa qo‘shuvchi" harakat deb atadi. Esminetslar Filippinga bosqichma-bosqich topshiriladi va mahalliy harbiylar ularni boshqarish bo‘yicha treninglardan o‘tkaziladi. Kema topshirish Yaponiyaning "Tinchlikparvar xavfsizlik siyosati" doirasida amalga oshirilmoqda.
Filippin hukumati Yaponiyaning bu yordamidan minnatdorligini bildirib, uni Xitoy bosimiga qarshi mustahkam tayanch deb atadi. Manila va Tokio o‘rtasidagi harbiy hamkorlik keyingi yillarda keskin kuchayib bormoqda. Har ikki davlat AQSh bilan uch tomonlama xavfsizlik alyansi doirasida harakat qilmoqda.
Xitoy esa bu harakatni mintaqaviy barqarorlikka tahdid deb baholamoqda. Pekin Yaponiya va Filippinning bunday qadamlarini "tashqi kuchlar aralashuvi" sifatida tanqid qilib, o‘z manfaatlarini himoya qilishga tayyor ekanini bildirgan. Shu tariqa Janubiy Xitoy dengizi yana global geosiyosiy qarama-qarshilik markaziga aylanmoqda.
