Dunyodagi eng yirik avtomobil tashuvchi kema Xitoydan Gretsiyaga ilk yukini muvaffaqiyatli yetkazdi
Yashil texnologiyalar yuk tashish sohasida yangi davrni boshlab berdi.
Xitoyda qurilgan va quyosh energiyasida harakatlanadigan dunyodagi eng katta avtomobil tashuvchi kema o‘zining ilk xalqaro yuk tashuvini muvaffaqiyatli yakunladi. Bu kema Xitoyda ishlab chiqarilgan 4000 ta avtomobilni Xitoydan Gretsiyaga yetkazib berdi. Mutaxassislar bu voqeani yuk tashish sanoatida muhim burilish nuqtasi sifatida baholamoqda. Bu haqda Global times xabar bergan.
Kema faqatgina an’anaviy yoqilg‘i emas, balki quyosh panellari orqali ishlab chiqarilgan energiya yordamida harakatlanadi. Uning bortida o‘rnatilgan ilg‘or texnologiyalar havoga chiqadigan zararli gazlar miqdorini sezilarli darajada kamaytiradi. Shu bois u ekologik toza transport vositasi sifatida katta e’tibor qozondi.
Yangi avlod avtomobil tashuvchi kemaning qurilishi Xitoyning “yashil logistikani” rivojlantirishga bo‘lgan intilishini namoyish etadi. Bu loyiha Xitoyning global transport bozoridagi pozitsiyasini yanada mustahkamlashi kutilmoqda. Kema hozirda turli xalqaro yuk tashish yo‘nalishlarida ishlatilishi rejalashtirilmoqda.
Mutaxassislarning fikricha, bu kabi loyihalar kelajakda dengiz transportida uglerod izini kamaytirishga xizmat qiladi. Xususan, ekologik barqaror transport vositalariga talab ortib borayotgan bugungi kunda, quyosh batareyali kemalar yuk tashish sohasida yangi imkoniyatlar ochmoqda.
