Rossiya ishchi kuchi tanqisligini hind mutaxassislar bilan qoplamoqda

Rossiya sanoat tarmoqlarida yuqori malakali mutaxassislar yetishmovchiligi ortib borayotgan bir paytda, mamlakat Hindistondan 1 million nafar mehnat muhojirini jalb qilishni rejalashtirmoqda. Bu haqda Ural Savdo-sanoat palatasi rahbari Andrey Besedin EAN agentligiga bergan intervyusida ma’lum qildi.

 

“Hindistonlik hamkasblarimdan olgan ma’lumotlarga ko‘ra, yil oxirigacha Hindistondan Rossiyaga, xususan, Sverdlovsk viloyatiga 1 million mutaxassis kelishi rejalashtirilmoqda. Yekaterinburgda Hindistonning yangi Bosh konsulligi ochilmoqda, u aynan shu masalalar bilan shug‘ullanadi”, – deya izoh berdi Besedin.

 

Uning so‘zlariga ko‘ra, Rossiyada ayni paytda ishchi kuchiga ehtiyoj nihoyatda yuqori. Bunga bir nechta omillar, jumladan, ayrim fuqarolarning Ukrainadagi harbiy harakatlarga jalb etilgani va yosh avlodning sanoat korxonalarida ishlashga qiziqishi yo‘qligi sabab bo‘lmoqda. Besedin bu holatni mamlakatda ilgari yo‘l qo‘yilgan mafkuraviy xatolar bilan bog‘lamoqda.

 

Hindistondan tashqari, Shri-Lanka va Shimoliy Koreya bilan ham hamkorlik o‘rnatilishi rejalashtirilgan. Biroq, Besedinning qayd etishicha, bu davlatlardan ishchi kuchini jalb etish amaliyoti bilan bog‘liq murakkabliklar mavjud.

 

Yangi keladigan mutaxassislar, asosan, metallurgiya va mashinasozlik sanoati uchun jalb etiladi.

 

Shu munosabat bilan, Rossiya Davlat Dumasining Mehnat, ijtimoiy siyosat va faxriylar ishlari bo‘yicha qo‘mitasi raisi Yaroslav Nilov bu tashabbusga munosabat bildirib, tashqi ishchi kuchi hisobiga kam ta’minlangan aholining bandligini ta’minlash mumkinligini ta’kidladi. Biroq u amaldagi mehnat migratsiyasi kvotalari rejalashtirilgan 1 milliondan kam ekaniga e’tibor qaratdi.

 

Unga ko‘ra, Rossiya mehnat bozorida tashqi resurslarga ehtiyoj yuqoriligicha qolmoqda.