Eron rasmiysi Trampga suiqasd tahdidi bilan chiqdi
Eron hukumati “Qon shartnomasi” nomli platforma orqali Tramp va Netanyaxuga nisbatan ochiq tahdidlar qildi.
Eron Oliy rahnamosining maslahatchisi Javad Larijoniy AQShning prezidenti Donald Trampga nisbatan ochiq tahdid bilan chiqdi. Eron davlat televideniyesida bergan intervyusida Larijoniy Trampga nisbatan dron orqali suiqasd uyushtirish imkoniyati haqida bayonot berdi. Bu haqda Oxu.Az xabar berdi.
Uning aytishicha, Tramp Floridadagi Mar-a-Lago kurortida dam olayotganida “kichik dron” yordamida hujum uyushtirish "juda oddiy" bo‘lishi mumkin. “Tramp quyoshda toblanayotganida kichik dron uning qornini teshib qo‘yishi mumkin. Bu juda oddiy”, — deya tahdidli fikr bildirdi Larijoniy.
Mazkur bayonot “Qon shartnomasi” deb nomlangan yangi onlayn platforma ishga tushirilgan davrga to‘g‘ri keldi. Platforma Eron hukumati tarafidan “Xudoning dushmanlari” deb atalgan shaxslarni jazolashga da’vat etadi va ular orasida ayniqsa Donald Tramp va Isroil Bosh vaziri Benyamin Netanyaxu ajratib ko‘rsatilgan.
Sayt ushbu shaxslar ustidan “jazoni amalga oshirish” uchun mukofotlar taklif qilmoqda. Ushbu platformaning asosiy maqsadi Oyatulloh Ali Xomanaiyga qarshi harakat qilgan deb hisoblangan shaxslar ustidan “adolatni qaror toptirish” ekani aytilmoqda.
Donald Tramp esa ushbu tahdidlarni izohlar ekan, Erondan kelayotgan bayonotlarning real kuchga ega emasligiga ishora qilgan, biroq ehtimoliy xavfni inkor etmagan.
