Yevropada tajovuzkor chumolilar infratuzilmalarga zarar yetkazmoqda
Shveytsariyada chumolilar 3 milliard funtlik loyiha qurilishini to‘xtatgan.
Buyuk Britaniyada ekologlar yangi xavf haqida ogohlantirmoqda – mamlakat hududida “super chumolilar” deb ataluvchi Tapinoma magnum turlari tez sur’atda ko‘paymoqda. Koloniyalar soni 5 millionga yaqinlashgan.
Daily Mail nashriga tayanib Oxu.Azning ma'lum qilishicha, ushbu chumolilar ilgari Yevropaning Germaniya, Fransiya va Shveytsariya kabi davlatlarida ham jiddiy muammolar keltirib chiqargan – piyodalar yo‘laklarining cho‘kishi, elektr ta’minotidagi uzilishlar va qurilish infratuzilmalarining buzilishi shular jumlasidandir.
Ko‘rinishidan oddiy qora chumolilarga o‘xshagan bu turlar nihoyatda tajovuzkor va o‘zgacha ijtimoiy tuzilishga ega. Ularning koloniyalarida minglab malika bo‘lishi mumkin. Eng ajablanarlisi – har bir koloniya bir-biriga raqib emas, balki hamkor sifatida yondashadi. Natijada ulkan super koloniyalar paydo bo‘ladi va ular o‘z hududini yashin tezligida kengaytiradi.
Shveytsariyada ana shunday yirik koloniya 3 milliard funt sterlinglik infratuzilma loyihasini to‘xtatishga majbur qilgani aytilmoqda.
Britaniyalik olimlar chumolilar allaqachon G‘arbiy Sasseks va Ssilli orollarida aniqlanganini bildirishmoqda. Ularning ta’kidlashicha, insektitsidlar ham samarasiz – “super chumolilar” zaharni aniqlab, ustidan tuproq bilan yopib tashlaydi.
Mutaxassislar fikriga ko‘ra, iqlim o‘zgarishi bu tur uchun yanada qulay muhit yaratmoqda va ularning shaharlarga kirib borish xavfi ortib bormoqda.
