Germaniyaga ketayotgan afg‘onlar Pokistonda hibsga olinmoqda

Pokiston va Germaniya o‘rtasida diplomatik ziddiyat kuchaymoqda. Bunga Germaniyaga borish uchun ruxsatnoma olgan, ammo Islomobodda qolib ketgan 2 500 dan ortiq afg‘onistonlik fuqarolarning taqdiri sabab bo‘lmoqda.

 

2021-yilda Tolibon hukumatga kelganidan so‘ng Germaniya ushbu afg‘onlarni qabul qilishga va’da bergan edi. Biroq hujjatlarni tekshirish jarayoni cho‘zilib ketgani bois, ko‘pchilik afg‘onistonliklar Pokistonda vizasi muddati o‘tgan holatda qolib ketdi.

 

WELT nashri xabarlariga ko‘ra, Germaniyaning migratsiya ishlari bo‘yicha federal idorasi va politsiyasi hujjatlarni tekshirishni sekin amalga oshirmoqda — o‘rtacha kutish muddati 8 oyga cho‘zilmoqda.

 

Pokiston esa bu vaziyatga ko‘z yuma olmay, Germaniyaga afg‘onlarni olib chiqish uchun ikki marotaba muddat belgilagan. So‘nggi muddat 30-iyun kuni tugadi. Shu bilan birga, rasmiylar afg‘onlar yashayotgan uylarni reyd qilmoqda.

 

Taxminan 150 nafar shaxs deportatsiya markazlariga yuborilgan. Ulardan ba'zilari Germaniyaning aralashuvi bilan qayta ozod qilingan, biroq vaziyat hanuz keskin.

 

Germaniya Tashqi ishlar vazirligi afg‘onlar deportatsiyasini to‘xtatish maqsadida muzokaralar olib bormoqda.