Fransiyada mahbus sumka ichiga yashirinib, qamoqdan qochdi
Mahbus uyushgan jinoyatchilik ishi bo‘yicha tergovda bo'lgan.
Fransiyaning janubi-sharqidagi Lyon-Korbas qamoqxonasida g‘aroyib qochish holati yuz berdi. Jazoni o‘tayotgan mahbuslardan biri ozod etilayotgan boshqa bir mahbusning sumkasiga yashirinib, qamoqdan chiqib ketgan. Bu haqda Fransiya OAVlariga tayanib BBC xabar berdi.
Qamoqxona ma’muriyati hodisa 11-iyul kuni yuz berganini tasdiqladi va voqea yuzasidan tergov ishlari boshlanganini ma’lum qildi. “Mahbus boshqa bir hibsdagi shaxsning ozodlikka chiqishidan foydalanib, sumkaga yashiringan va qamoqxonadan chiqib ketgan”, deyiladi rasmiy bayonotda.
Mahbus bir nechta jinoyatlarda gumon qilinayotgani, shuningdek, uyushgan jinoyatchilik ishi bo‘yicha ham tergov qilinayotgan edi. Qochib ketgan mahbusning qayerdaligi hozircha noma’lum.
Ma’lumotlarga ko‘ra, Lyon-Korbas qamoqxonasida mahbuslar soni ortib ketgan. 2025-yil 1-may holatiga ko‘ra, 678 o‘ringa mo‘ljallangan qamoqxonada qariyb 1200 nafar mahbus saqlanmoqda. Shu sababli qamoqxona sharoitlari yuzasidan xavotirlar ortib bormoqda.
