Ispaniyada salkam 1200 nafar odam issiqdan vafot etdi
Halok bo‘lganlarning asosiy qismi qariyalardan iborat.
May-iyul oylarida kuzatilgan o‘ta yuqori harorat Ispaniyada 1180 kishining bevaqt o‘limiga sabab bo‘ldi. Bu haqida mamlakat sog'liqni saqlash vazirligi xabar berdi.
Qayd etilishicha, 16-maydan 13-iyulgacha issiqlik to‘lqinlari bilan bog‘liq 1180 ta o‘lim qayd etilgan. Halok bo‘lganlarning asosiy qismi (95 foizdan ortig‘i) 65 yoshdan oshganlardir.
O‘tgan yilning shu davrida Ispaniyada jazirama tufayli 70 kishi halok bo‘lgandi. Bundan tashqari, iyul oyining birinchi haftasida Ispaniyada issiqlik bilan bog‘liq o‘limlar soni iyun oyidagi umumiy ko‘rsatkichga nisbatan 47 foizga oshgan.
Ispaniyaning jazirama to‘lqinlaridan eng ko‘p zarar ko‘rgan hududlari mamlakatning shimoliy qismida joylashgan Galisiya, La-Rioxa, Asturiya va Kantabriya bo‘ldi, ularda so‘nggi yillarda anʼanaviy tarzda yozgi issiq havo harorati sezilarli darajada oshgan.
