Suriyada yana urushlar boshlandi. Isroil mojaroga aralashmoqda
Druz guruhlari va badaviy jangchilar o‘rtasida boshlangan qurolli mojaro keskin tus olmoqda. O’nlab qurbonlar, yuzlab jarohatlanganlar bor.
Suriya janubidagi Suvayda viloyatida qurollangan druz guruhlari va badaviy jangchilar o‘rtasida boshlangan qurolli mojaro keskin tus oldi. To‘qnashuvlar 13-iyul kuni bir-birini o‘g‘irlash holatlaridan boshlangan. Natijada ikki tomon o‘rtasida otishma yuzaga kelib, og‘ir yo‘qotishlarga olib keldi.
Rasmiy ma’lumotlarga ko‘ra, mojaro oqibatida kamida 37 kishi halok bo‘ldi, ulardan 27 nafari druz jamoasiga mansub. Qurbonlar orasida bolalar ham bor. Mahalliy kasalxonalarda 100 dan ortiq yaradorlarga yordam ko‘rsatilmoqda. Ayrim ma’lumotlarga ko‘ra, halok bo‘lganlar soni 90 nafardan oshgan.
Suriya Mudofaa vazirligi tinchlikni tiklash maqsadida viloyatga harbiy kuchlar yuborganini ma’lum qildi. Vaziyat keskinlashgani sababli Isroil armiyasi Suvayda hududidagi hukumat harbiy transport vositalariga zarbalar berdi. Isroil rasmiylari bu harakatni "druz fuqarolarini himoya qilish" deb izohladi.
Rasmiy Tel-Aviv Suvayda va unga tutash hududlar demilitarizatsiya qilinishini talab qilmoqda. Isroil hukumati bu yerda yangi tuzilgan Suriyaning muvaqqat hukumati tomonidan xavfsizlik tahdidi paydo bo‘lishi mumkinligini bildirmoqda.
Suriya prezidenti Ahmad al-Shar’a esa mamlakatda ijtimoiy barqarorlikni tiklashga chaqirib, xavfsizlik kuchlarini mojaro hududlariga joylashtirishni buyurdi. Shu bilan birga, diniy yetakchilar va mahalliy hokimiyat vakillari tinchlikni saqlashga chaqirmoqda.
Suriya Tashqi ishlar vazirligi barcha davlatlarni Suriya suverenitetini hurmat qilishga va tashqi aralashuvlardan tiyilishga chaqirdi.
