Isroil kuchlari Damashqda joylashgan Suriya Bosh shtabi va Prezident saroyiga kuchli zarba berdi
Hujum Suriya janubidagi druz aholiga qarshi harakatlarga javoban amalga oshirildi.
Isroil Mudofaa kuchlari (IDF) tomonidan Suriyaning poytaxti Damashqda joylashgan harbiy obyektlarga, jumladan, Suriya Qurolli Kuchlari Bosh shtabi va Prezident saroyi binosiga zarba berildi. Bu haqda IDF va xorijiy axborot agentliklari xabar bermoqda.
Isroil rasmiylarining bayonotlariga ko‘ra, zarbalar Suriya janubidagi Suvayda viloyatida druz jamoasiga qarshi harakatlar ortidan amalga oshirilgan.
Isroil mudofaa vaziri Isroel Kats bu hujumni “Damashqqa ogohlantirish davrining tugaganiga” ishora deb atadi. U ijtimoiy tarmoqdagi sahifasida quyidagicha bayonot bergan: “Endi og‘riqli javob zarbalari boshlanadi. As-Suvaydo hududida harbiy operatsiyalar davom etadi va druzlarga hujum qilgan kuchlar yo‘q qilinadi.”
IDF bayonotida zarba Damashqdagi bosh shtab binosining kirish qismiga yo‘naltirilgani qayd etilgan. Ma’lumotlarga ko‘ra, zarba natijasida bino jiddiy zarar ko‘rgan yoki butunlay vayron bo‘lgan.
Isroil tomoni Suriya janubidagi vaziyatni, xususan hukumat kuchlarining druz aholiga nisbatan harakatlarini diqqat bilan kuzatib borayotganini ta’kidladi. Rasmiy bayonotga ko‘ra, IDF siyosiy rahbariyat ko‘rsatmasiga binoan aniq nishonlarga zarbalar berishda davom etmoqda.
Hozircha hujum oqibatida qurbonlar yoki jabrlanganlar to‘g‘risida rasmiy ma’lumot berilmagan.
