Tramp ma’muriyati 500 tonna bolalar uchun mo‘ljallangan oziq-ovqatni yo‘q qilishga buyruq berdi
Afg‘oniston va Pokistondagi 1,5 million bolaning haftalik ehtiyoji uchun mo‘ljallangan mahsulotlar byurokratik to‘siqlar tufayli bekor qilindi.
AQSh prezidenti Donald Tramp boshchiligidagi ma’muriyat USAID tomonidan ajratilgan 500 tonna yuqori kaloriyali pechenyeni yo‘q qilishga qaror qildi. The Atlantic nashrining yozishicha, bu mahsulotlar Afg‘oniston va Pokistondagi 1,5 million bolani bir hafta davomida oziqlantirish uchun mo‘ljallangan edi.
Yordam mahsulotlari Dubaydagi omborda saqlanayotgan bo‘lib, muddati tugash arafasida qolib ketgan. Sababi esa — USAID faoliyatining Tramp ma’muriyati tomonidan qisqartirilishi va yordamni tarqatishga ruxsat berilmaganidir.
Ushbu oziq-ovqatlar tabiiy ofatlar va urush zonalaridagi muhtoj bolalarga yetkazilishi kerak edi. Ammo byurokratik to‘siqlar va siyosiy qarorlar tufayli mahsulotlar yetkazilmay, yo‘q qilinishi belgilandi. Yoqib yuborish jarayoning o‘zi ham 130 ming dollar xarajat talab qiladi.
Ushbu holat global ochlik muammosi ortib borayotgan bir paytda sodir bo‘lgani keng jamoatchilik tomonidan tanqidga sabab bo‘ldi. Mutaxassislar bu qarorni insonparvarlik tamoyillariga zid deb baholamoqda.
