Isroil 600 ming falastinlik uchun yopiq “gumanitar shahar” barpo etishni rejalashtirmoqda
Bu shahar yopiq hudud bo‘lib, odamlarning erkin harakatlanishi cheklanadi.
Isroil rasmiylari G‘azo sektorida davom etayotgan harbiy harakatlar fonida yangi tashabbusni ilgari surdi: ular 600 mingga yaqin falastinlikni joylashtirish uchun Rafah yaqinida “gumanitar shahar” barpo etish rejasini ko‘rib chiqmoqda. Bu haqda The National nashri muzokaralarga yaqin manbalarga tayanib xabar bermoqda.
Isroil mudofaa vaziri Yoav Galantning topshirig‘i asosida tayyorlangan mazkur reja doirasida G‘azo va Isroil chegarasi bo‘ylab 2 kilometr chuqurlikdagi xavfsizlik zonasi ham tashkil etilishi ko‘zda tutilgan. Ushbu hudud falastinliklarning harakatlanishini cheklovchi, doimiy nazoratdagi zonaga aylanishi mumkin.
Avvalroq, mudofaa vaziri İsrael Kats Rafahda jangovar harakatlar natijasida vayron bo‘lgan hududda maxsus “gumanitar shahar” qurish imkoniyatlarini o‘rganishni buyurgan edi. Bu yerda, Isroil ma’lumotiga ko‘ra, HAMAS harakatida bevosita ishtirok etmagan fuqarolar vaqtincha joylashtirilishi mumkin.
Biroq Bosh vazir Benyamin Netanyaxu bu reja rasmiy hukumat pozitsiyasi emasligini, balki koalitsiyadagi o‘ng qanot partiyalari tashabbusi sifatida ko‘rilayotganini bildirgan. Uning so‘zlariga ko‘ra, bu borada hali hukumat darajasida rasmiy qaror mavjud emas.
Shunga qaramay, Tel-Aviv Misr va Qatar vositachilari bilan olib borilayotgan muzokaralarda ushbu reja ustida ish olib borilayotganini tasdiqlagan. Shuningdek, G‘azo sektorining shimoliy hududlaridan aholini janubga – Xon-Yunis shahri yaqinidagi tor qirg‘oq zonasiga ko‘chirish taklifi ham bildirilgan.
