Suriya mojarosiga diplomatik yechim: Turkiya vositachilik qildi
Turk razvedkasi va yuqori darajadagi muloqotlar natijasida druzlar va hukumat kuchlari o‘rtasida sulhga erishildi. Muzokaralarda AQSh va Isroil ham ishtirok etdi.
Suriyada so‘nggi kunlarda avj olgan qurolli to‘qnashuvlar va Isroil tomonidan amalga oshirilgan havo hujumlari ortidan mintaqada vaziyat murakkablashgan edi. Ammo Turkiya hukumati va razvedka xizmati o‘zining faol diplomatik harakatlari bilan mojaroni jilovlashda muhim vositachilik rolini o‘ynadi. Bu haqda Al Arabiya nashri turli diplomatik manbalarga tayanib xabar bermoqda.
Manbalarga ko‘ra, Turkiya Milliy razvedka tashkiloti (MIT) rahbari Ibrohim Kalin bevosita Suriyadagi druzlar yetakchisi bilan muzokaralar olib borgan. Muzokaralar davomida druz jangarilarining qurolli harakatlarini to‘xtatish va vaziyatni barqarorlashtirish masalalari muhokama qilingan.
Shuningdek, Kalin AQSh, Isroil va Suriyaning razvedka rahbarlari bilan alohida-alohida aloqaga chiqib, hududda sodir bo‘lgan havo hujumlarining oqibatlarini kamaytirish va tomonlarni zudlik bilan o‘zaro kelishuvga chaqirishga qaratilgan muzokaralar o‘tkazgan.
Diplomatik manbalarga ko‘ra, Kalin hatto Suriyaning Prezident administratsiyasi rahbari Ahmad al-Shara bilan muloqot olib borgan. Ular o‘rtasida Isroilning Damashq va Suvayda viloyatlaridagi hujumlari, mintaqadagi druz va badaviy guruhlar o‘rtasidagi to‘qnashuvlar, hamda Suriyaning ichki xavfsizlik strategiyasi muhokama qilingan.
