Biz Suriyaning bo‘linishiga yo‘l qo‘ymaymiz — Erdog‘an
Turkiya rahbari Isroilning Suriyaga hujumini qoralab chiqdi.
Turkiya Suriyaning hududiy yaxlitligini himoya qilish siyosatiga amal qilishda davom etadi va uning bo‘linishiga yo‘l qo‘ymaydi. Bu haqda mamlakat rahbari Rajab Toyyib Erdog‘an xalqqa qilgan murojaatida aytib o‘tdi.
“Qo‘shnimiz Suriyaning hududiy yaxlitligini himoya qilish bizning asosiy siyosatimizdir. Biz Suriyaning bo‘linishiga rozilik berganimiz yo‘q va bermaymiz ham”, — deya taʼkidlagan Turkiya yetakchisi.
Erdo‘g‘on o‘z nutqida Isroilga nisbatan keskin fikrlar aytdi va uni “terrorchi davlat” deb atadi. Shuningdek, Tel-Avivni xalqaro normalarni buzganlikda va Suriya hududiga noqonuniy zarba berishda ayblagan.
“Isroil qonun, huquq va tamoyillarni tan olmaydi”, — degan Erdog‘an o‘z murojaatida.
Eslatib o‘tamiz, avvalroq Isroil Bosh vaziri Benyamin Netanyaxu Suriyadagi Golan tepaliklaridan Druzlar tog‘larigacha bo‘lgan hudud demilitarizatsiya qilinishini maʼlum qilgandi.
Bosh vazirning aytishicha, Isroil o‘z manfaatlarini va Arab Respublikasidagi druzlar aholisi xavfsizligini himoya qilishda davom etadi.
