Rossiyaga kirayotgan migrantlar karantinga olinishi mumkin
2025-yilning besh oyida Rossiyada 1266 ta infeksiya holati qayd etilgan, bu o‘tgan yilga nisbatan 260 foizga ko‘p.
Rossiyada so‘nggi vaqtlarda meningit holatlarining keskin ortib borayotgani sabab mamlakatga kirib kelayotgan migrantlarni karantinga joylashtirish masalasi ko‘tarilmoqda. Bu taklif bilan Rossiya Davlat Dumasi deputati Sergey Mironov chiqdi.
Deputatning ta’kidlashicha, ushbu ehtiyot chorasi infeksion kasalliklarning, xususan, meningitning tarqalishini jilovlashga xizmat qiladi. Unga ko‘ra, kasallik holatlarining ko‘payishi emlanmagan xorijliklar bilan bog‘liq bo‘lishi mumkin.
— Ularni mamlakatga kirib bo‘lgach nazoratga olishning foydasi yo‘q, — deydi Mironov.
Deputat shuningdek, mehnat vizasi olish uchun migrantlardan xavfli kasalliklar yo‘qligini tasdiqlovchi ma’lumotnoma talab qilinishi kerakligini ham ilgari surdi.
Ma’lumotlarga ko‘ra, 2025-yilning dastlabki besh oyida Rossiyada 1266 ta infeksion kasallik holati aniqlangan. Bu ko‘rsatkich o‘tgan yilning shu davriga nisbatan 260 foizga oshgan.
