Amerikaning kruiz laynerida 134 yo‘lovchi noma’lum virusga chalindi
Kompaniya sog‘liqni saqlash va xavfsizlik borasida yuqori darajadagi chora-tadbirlarni amalga oshirayotganini bildirgan.
Amerikaning mashhur Royal Caribbean Navigator of the Seas kruiz laynerida 134 nafar yo‘lovchi va 11 nafar ekipaj a’zosi noma’lum virusga chalindi. Kema 4-iyul kuni Los-Anjeles portidan yo‘lga chiqib, 8-iyul kuni Meksikaning Puerto-Valyarta shahrida to‘xtagan va uch kundan so‘ng AQSHga qaytib kelgan. Kruizda jami besh mingdan ortiq yo‘lovchi bo‘lgan. bu haqda Daily Express nashri xabar bergan.
Kasallanganlar orasida o‘xshash alomatlar kuzatilgan: qusish, ich ketishi va oshqozon spazmasi. Mutaxassislar buni norovirus bilan bog‘lashmoqda, ammo aniq tashxis hali qo‘yilmagan. Royal Caribbean vakillarining ma’lum qilishicha, kasallangan yo‘lovchilar izolyatsiya qilinib, kema bortida sanitariya choralar kuchaytirilgan.
Kompaniya sog‘liqni saqlash va xavfsizlik borasida yuqori darajadagi chora-tadbirlarni amalga oshirayotganini bildirdi. “Biz jamoat sog‘liqni saqlash idoralari tavsiyalaridan ham yuqori bo‘lgan sanitariya tartiblarini joriy etganmiz”, deydi Royal Caribbean Group vakillari.
So‘nggi oylarda dunyoda yana bir nechta viruslar tarqalmoqda. Iyun oyida esa Xitoy va Osiyoning boshqa mamlakatlarida COVID-19 ning yangi NB.1.8.1 varianti qayta avj olgani xabar qilingandi. Shu sabab, har qanday virusli kasalliklar atrofida ehtiyotkorlik yanada kuchaymoqda.
