Rossiya Ukrainaga raketa va dronlar bilan hujum qildi
Jami 10 ta hududga tunda zarba yo‘llangan.
Bugun, 19-iyulga o‘tar kechasi Ukrainaga 344 ta dron, 12 ta “Iskander-M/KN-23” ballistik raketasi, 8 ta “Iskander-K” qanotli raketasi va 15 ta X-101 qanotli raketasi bilan hujum uyushtirildi. Bu haqida mamlakat Qurolli Kuchlari maʼlum qildi.
Ukraina harbiylarining maʼlum qilishicha, jami 208 ta dron va raketa urib tushirilgan. Jumladan, 185 ta Shahed droni, 9 ta X-101 raketasi hamda 7 tadan “Iskander-M/KN-23” va “Iskander-K” raketasi yo‘q qilingan. Yana 7 ta raketa va 129 ta imitatsion dron nishonga yetib bormagan, ular “lokatsiya bo‘yicha yo‘qolgan” yoki radioyelektron kurash vositalari bilan zararsizlantirilgan.
“5 ta raketa va 30 ta zarba beruvchi dron 12 ta joyga tushgani, shuningdek, urib tushirilgan raketa va dronlarlarni parchalari 7 ta hududga qulagani qayd etildi”, deya bayonot berdi Ukraina harbiylari.
