15 yoshida komaga tushgan Saudiya shahzodasi olamdan o‘tdi
20 yil davomida hushiga kelmagan Alvalid bin Xolid bin Talal “uyqudagi shahzoda” nomini olgan edi.
Saudiya Arabistoni Qirollik oilasining a’zosi, Alvalid bin Xolid bin Talal Al Saud uzoq davom etgan og‘ir xastalikdan so‘ng vafot etdi. U 20 yildan ortiq vaqt davomida koma holatida bo‘lgan.
Shahzoda Alvalid 1990-yilda tug‘ilgan bo‘lib, shahzoda Xolid bin Talal Al Saudning to‘ng‘ich farzandi va Saudiya milliarderi, taniqli arbob Alvalid bin Talal Al Saudning jiyani edi. 2005-yilda Londondagi harbiy litseyda tahsil olayotgan vaqtida yo‘l-transport hodisasiga uchragan va og‘ir bosh miya shikastlanishi hamda ichki qon ketishi oqibatida hushini yo‘qotgan. O‘sha vaqtda u atigi 15 yoshda edi.
Voqeadan so‘ng AQSH va Ispaniyaning yetakchi tibbiyot muassasalarida mutaxassislar tomonidan ko‘rsatilgan shoshilinch va uzoq muddatli davolash choralari samara bermagan. Shunga qaramay, shahzodaning otasi, shahzoda Xolid bin Talal, farzandining hayotiga sun’iy nafas va qo‘llab-quvvatlovchi qurilmalarni uzib qo‘yish haqidagi tavsiyalarni qat’iyan rad etib, doimo o‘g‘lining sog‘ayishiga umid qilib yashagan. Ba’zida kuzatilgan beixtiyor harakatlar esa oilada oz bo‘lsa-da, ijobiy siljish ehtimoli borligi haqidagi ishonchni saqlab turgan.
Shahzoda Alvalid bin Xolid bin Talal Al Saudning vafoti munosabati bilan Saudiya Qirollik oilasi, shuningdek, ko‘plab davlat arboblari, diniy rahbarlar va xalq vakillari tomonidan chuqur ta’ziya izhor etildi.
