AQSh vizalari qimmatlashadi: yangi to‘lovlar 2026-yilda kuchga kiradi
Asosan talaba va turistik vizalar narxi ikki baravardan ko‘proqqa chiqishi mumkin.
2026-yildan boshlab AQSh barcha asosiy noimmigratsion vizalar uchun yangi, qo‘shimcha 250 dollarlik “viza yaxlitlik to‘lovi”ni joriy etadi. Bu to‘lov Prezident Donald Tramp tomonidan ilgari surilgan va yaqinda qabul qilingan “Bir Katta Chiroyli” qonun loyihasining tarkibiy qismi hisoblanadi.
Yangi tartib turistik (B1/B2), talaba (F/M), ishchi (H-1B) hamda almashuv dasturlariga (J) taalluqlidir. Faqat diplomatik A va G toifali vizalar bu to‘lovdan ozod etilgan.
Mutaxassislarning hisob-kitoblariga ko‘ra, ayniqsa turistik vizani olish xarajati endilikda $450–$470 atrofida bo‘lishi kutilmoqda, bu esa hozirgi narxdan ikki yarim barobar ko‘pdir. Shuningdek, viza olish bilan bog‘liq boshqa xarajatlar ham oshmoqda.
Yangi to‘lov qonun loyihasida “yaxshi niyat depoziti” sifatida talqin qilingan. Ariza beruvchi agar vizaning amal qilish muddati tugagach AQShni qonuniy ravishda, ya’ni belgilangan muddat ichida tark etsa, ushbu depozit qaytarilishi mumkin. Biroq talaba va ish vizalari holatida bu mablag‘ yillar davomida qolib ketishi ehtimoli mavjud.
Amerika Sayohat Agentliklari Uyushmasi (ASTA) va AQSh Sayohat Uyushmasi ushbu choralarni tanqid ostiga oldi. Sayohat uyushmasi rahbari Jeff Friman “bunday to‘lovlar xalqaro sayohat sanoatiga salbiy ta’sir ko‘rsatadi”, deya bayonot berdi.
Qonun loyihasining o‘zi esa jamoatchilikda va siyosiy doiralarda katta bahs-munozaralarga sabab bo‘ldi. Senatda loyiha vitse-prezident J.D. Vensning hal qiluvchi ovozi bilan, minimal farqda tasdiqlandi. 3-iyul kuni esa Vakillar palatasi uni ozchilik ustunligi bilan ma’qulladi.
Mashhur tadbirkor Ilon Mask qonun loyihasining ashaddiy tanqidchilaridan biri bo‘lib chiqdi. U bu choralarni “AQSh davlat qarzini orttiruvchi xavfli tashabbus” deb baholadi. Mask bu boradagi noroziligini ijtimoiy tarmoqlarda ochiq bildirgan, hattoki iyun oyida Donald Tramp bilan shaxsiy ziddiyatga ham kirishgan edi.
