Indoneziyada bortida 280 ga yaqin yo‘lovchisi bo‘lgan kema yonib ketdi
Rasmiylar halok bo‘lganlar borligi haqidagi xabarlarni hozircha tasdiqlamadi.
20-iyul kuni Indoneziya suv hududlarida yo‘lovchilar bilan to‘la paromda katta yong‘in yuz berdi. Mahalliy OAV va guvohlarning bergan xabarlariga ko‘ra, parom bortida 280 ga yaqin kishi bo‘lgan.
Dastlabki ma’lumotlarga ko‘ra, yong‘in pastki palubalardan quyuq qora tutun chiqishi bilan boshlangan. Bu holat bortda vahima va tartibsizlikka olib kelgan. Yo‘lovchilarning ba’zilari kemadan sakrab tushishga majbur bo‘lgan, ayrim kadrlarda parom xodimlari odamlarni evakuatsiya qilishga harakat qilayotgani, ularga qutqaruv jiletlarini mahkamlashda yordam berayotgani aks etgan.
Voqea joyidan olingan videolarda yo‘lovchilarning qichqirig‘i, yordam chaqiruqlari va paromning olov ichida qolgan qismi yaqqol ko‘rinadi. OAVlarda tarqalgan ma’lumotlarga ko‘ra, bortda bo‘lgan odamlarning ba'zilari yong‘in o‘chguncha palubada qamalib qolgan bo‘lishi mumkin.
Indoneziya rasmiy idoralari hozircha qurbonlar haqida aniq ma’lumot bergani yo‘q. Favqulodda vaziyatlar xizmatlari va qutqaruv guruhlari hodisa joyiga yetib borib, evakuatsiya va yong‘in o‘chirish ishlarini davom ettirmoqda. Voqeaning sabablari bo‘yicha tergov harakatlari boshlangan.
