Tayvanda "vampir murabbiy" talaba qizlarni qon topshirishga majburlagani fosh bo‘ldi
Universitet murabbiysi talabalarni kredit bermaslik bilan qo‘rqitgan.
Tayvanda ayollar futboli murabbiyasi talabalarni o‘qish krediti evaziga qon topshirishga majburlagani bo‘yicha janjal yuzaga keldi. Bu haqda South China Morning Post va Mentoday.ru nashrlari xabar berdi.
Tayvan Milliy Normal universitetida ishlovchi 61 yoshli murabbiy Chjou Taiying talaba qizlarga bosim o‘tkazib, ularni ko‘p miqdorda qon topshirishga undagan. Ushbu holat talabalar tomonidan oshkor qilingach, u “vampir murabbiy” laqabini oldi.
Ayblovlarga ko‘ra, sport krediti olish uchun talabalar hatto 14 kun ketma-ket, ba’zida kuniga bir necha marotaba qon topshirishga majbur bo‘lgan. Talabalardan biri, Tszyan ismli qizning so‘zlariga ko‘ra, u o‘qish davomida 200 ga yaqin probirka qon bergan. "Sakkizinchi kun ketma-ket qon topshirayotganimda, qo‘llarimdagi tomirlarni topish qiyin bo‘lib qolgan edi", — deya izoh berdi u.
Qon topshirish jarayonlari universitet hududida, “ilmiy eksperiment” sifatida o‘tkazilgan. Biroq qonni kim olgani va bu shaxslar malakali tibbiyot mutaxassislari bo‘lgan-bo‘lmaganligi noma’lumligicha qolmoqda. Ayrim talabalarning aytishicha, muntazam qon topshirish oqibatida sog‘ligi yomonlashgan va ular kasallik ta’tiliga chiqishga majbur bo‘lgan. Shunga qaramay, aksariyat o‘quvchilar bu haqda ota-onalariga aytishga jur’at etmagan.
Mazkur mojaro jamoatchilik e’tiboriga tushgach, 13-iyul kuni universitet rasmiy bayonot berib, Chjou Taiyingni barcha murabbiylik va ma’muriy lavozimlardan chetlashtirgan. Endilikda unga har qanday sport jamoasini boshqarish taqiqlangan.
Murabbiyning bu harakatlar orqali qanday manfaat ko‘rgani hozircha aniqlanmagan. Rasmiy donorlik qonun-qoidalariga ko‘ra, qon topshirish uchun maxsus markazlarga murojaat qilish, zarur hujjatlarni rasmiylashtirish talab etiladi. Bunday sharoitda, kampusda, noma’lum shaxslar tomonidan olib borilgan qon to‘plash ishlari qonuniy emasligi, hatto xavfli ekani ta’kidlanmoqda.
Mazkur voqea Tayvanda keng norozilik uyg‘otdi va tergov harakatlari davom etmoqda.
