Ukraina dronlari hujumi sababli Moskva osmoni yopildi, yuzlab parvozlar bekor qilindi
Rossiya havo mudofaasi 20 dan ortiq dronni urib tushirdi, biroq hujum Moskva osmonining yopilishiga va aviatsiya tizimida falaj holatga olib keldi.
20-iyulga o‘tar kechasi Ukraina tomonidan Moskvaga uchuvchisiz uchoqlar orqali amalga oshirilgan keng ko‘lamli hujum sababli Rossiya poytaxtining havo hududi vaqtincha yopildi. Bu haqda Moskva meri Sergey Sobyanin va Rossiya Mudofaa vazirligi vakillari rasmiy bayonot berdi deydi meduza nashri.
Soat 18:00 dan boshlab Rossiya havo mudofaasi kuchlari Moskva va uning atrofida 20 dan ortiq dronni aniqlab, ularning aksariyatini urib tushirdi. Rasmiy ma’lumotlarga ko‘ra, 19 ta dron Moskva viloyati osmonida to‘xtatilgan, 16 tasi bevosita Moskva tomonga yo‘naltirilgan edi. Shuningdek, Zelenograddagi ko‘p qavatli turar-joy binosiga bir dron urilgan, binoga jiddiy zarar yetmagan, qurbonlar yo‘q. Biroq voqea joyida ikki avtomobil yonib ketgani tasdiqlandi.
Mazkur hujum oqibatida Moskvaning Sheremetyevo, Vnukovo, Domodedovo va Jukovskiy aeroportlarida samolyotlarning kelish va jo‘nashiga vaqtinchalik cheklovlar joriy etildi. Rossiya Federal havo transporti agentligi vakili Artem Korenyakoning so‘zlariga ko‘ra, parvozlar xavfsizligini ta'minlash maqsadida Nijniy Novgorod, Kaluga va Yaroslavl aeroportlariga ham ta’sir ko‘rsatgan cheklovlar kiritilgan.
Sheremetyevoda parvozlar to‘xtab qolgan yo‘lovchilar aeroport polida va sun’iy o‘t ustida tunashga majbur bo‘ldi. Astra va boshqa Telegram-kanallarda joylashtirilgan videolavhalarda yuzlab fuqarolar yerda uxlashga majbur bo‘lgani ko‘rsatilgan.
"Aeroflot" va "Pobeda" aviakompaniyalari bir necha reyslarni, jumladan Minskga reyslarni bekor qilgan. NordStar aviakompaniyasi esa Krasnoyarskdan Moskvaga parvozlarini amalga oshira olmagan. Rosaviatsiyaning rasmiy ma’lumotiga ko‘ra, 134 ta samolyot muqobil aerodromlarga yo‘naltirilgan. Pulkovo (Sankt-Peterburg) aeroporti Moskvaga 30 ga yaqin reysni vaqtincha qabul qilgan.
Yo‘lovchilar aeroportda oziq-ovqat, suv va mehmonxona xizmatlari ta’minlanmaganidan shikoyat qilishgan. Antaliyadan uchib, Pulkovoda majburiy qo‘nishga duch kelgan yo‘lovchilar ekipajdan aniq ma’lumot ololmagani, 400 ga yaqin inson, jumladan, bolalar samolyotda qolib ketgani, kompaniya vakillari esa hech qanday yordam ko‘rsatmaganini bildirgan.
20-iyul kuni tushdan keyin Moskvadagi Sheremetyevo va Vnukovo aeroportlarida cheklovlar qisqa muddatga bekor qilindi, biroq Moskva vaqti bilan 12:30da Sheremetyevoda, so‘ngra Vnukovoda cheklovlar yana tiklandi.
Mazkur voqeaga javoban Rossiya ham Ukrainaga qarata havo hujumlari uyushtirgan. Ukraina Harbiy havo kuchlari 57 ta drondan 18 tasini urib tushirganini, 7 tasi esa elektron urush vositalari yordamida yo‘ldan adashtirilganini bildirdi.
So‘nggi kunlarda Ukraina dronlarining Rossiya hududiga hujumlari sezilarli darajada kuchaygan. Ma’lumotlarga ko‘ra, Zelenskiy-Tramp o‘rtasidagi 4-iyuldagi telefon suhbatidan so‘ng, 11 kun ichida Moskva va Moskva viloyatiga kamida 9 marotaba dron hujumlari qayd etilgan.
