Microsoft’dagi zaiflik global kiberhujumlarga sabab bo‘ldi
Mutaxassislar minglab serverlar xavf ostida ekanini bildirgan. Microsoft hozircha bulutli xizmatlar himoyalanganini ta’kidlamoqda.
Xakerlar Microsoft SharePoint dasturidagi xavfsizlik zaifligidan foydalanib, turli davlatlardagi muassasa va tashkilotlarga keng ko‘lamli kiberhujum uyushtirgan. Bu haqda The Washington Post nashri xabar bermoqda.
Xususan, AQSh, Xitoy, Kanada, Avstraliya va boshqa davlatlarda joylashgan davlat organlari, universitetlar, energetika va telekommunikatsiya kompaniyalari xakerlar hujumiga uchragan. Ular tashkilotlar o‘rtasida kontent almashuvi va hamkorlik uchun keng foydalaniladigan Microsoft SharePoint dasturiy platformasidagi jiddiy zaiflikdan foydalangan.
CrowdStrike kompaniyasi vitse-prezidenti Adam Meersning so‘zlariga ko‘ra, zaiflik minglab serverlarga taalluqli bo‘lib, “SharePoint serveriga ega barcha tashkilotlar ayni xavf ostida turibdi”. Mutaxassislar ushbu holatni “juda jiddiy tahdid” deb baholamoqda.
Shu bilan birga, Microsoft kompaniyasi SharePoint Online — ya'ni bulutli xizmatlar asosida ishlovchi versiyasi bu hujumdan zarar ko‘rmaganini ma’lum qilgan.
Dastlab kompaniya foydalanuvchilarga server dasturiy ta'minotini vaqtincha o‘chirish yoki internetdan uzib qo‘yishni tavsiya qilgan. Keyinchalik, SharePoint dasturining ayrim versiyalari uchun xavfsizlikni kuchaytiruvchi yangilanishlar chiqarildi.
Mazkur kiberhujum yuzasidan AQSh rasmiylari Kanada va Avstraliya bilan birgalikda tergov ishlarini olib bormoqda.
