Rossiyada ayrim kasblar uchun muhojirlarga rus tili talabi kuchaytirildi
Til va qonunlarni bilmaydigan chet elliklar Rossiyada odamlar bilan bevosita muloqot talab qilinadigan kasblarda ishlay olmaydi.
Rossiya Federatsiyasi Mehnat va aholini ijtimoiy muhofaza qilish vazirligi xorijiy fuqarolarni ishga qabul qilish tartibiga oid qonun hujjatlariga bir qator o‘zgartirishlar kiritmoqda. Bu haqda vazir o‘rinbosari Andrey Pudov Davlat Dumasining mehnat masalalari bo‘yicha qo‘mitasi yig‘ilishida ma’lum qildi.
Yangi tartibga ko‘ra, Rossiyada haydovchi, tibbiyot xodimi va savdo sohasida faoliyat yurituvchi muhojirlar rus tilini, Rossiya tarixini va qonunchiligini bilish bo‘yicha test topshirish majburiyatidan ozod qilinmaydi.
Bu o‘zgarishlar ilgari Davlat Dumasi tomonidan ko‘rib chiqilgan hukumat kvotasi asosida ishlayotgan muhojirlar uchun testlardan ozod qilish haqidagi qonun loyihasiga javoban ishlab chiqildi. Duma raisi Vyacheslav Volodinning ta’kidlashicha, til va qonunlarni bilmaydigan muhojirlarning muloqot talab qilinadigan kasblarda ishlashi Rossiya fuqarolari bilan samarali muloqotga to‘sqinlik qilishi mumkin.
Shu bois Mehnat vazirligi yangi buyruq loyihasini tayyorladi. Unga ko‘ra, malakali chet ellik tibbiyot xodimlari endi kvotadan mustasno tartibda ishlash huquqiga ega bo‘lmaydi. Bundan tashqari, Rossiya sub’yektlari kvota asosida ishga qabul qilish bo‘yicha taklif tayyorlarkan, endilikda muloqotga asoslangan kasblar — haydovchi, sotuvchi, tibbiyot xodimi kabi lavozimlarga migrantlarni ishga jalb etish uchun ariza topshirolmaydi.
