Tehronda Rossiya, Xitoy va Eron vakillari uchrashuvi bo‘lib o‘tadi
Uch tomonlama uchrashuvda Eronning yadroviy dasturi va BMT sanksiyalarining qayta tiklanish xavfi muhokama qilinadi.
22-iyul kuni Tehron shahrida Rossiya, Eron va Xitoy vakillarining uch tomonlama uchrashuvi bo‘lib o‘tadi. Uchrashuvda asosiy e’tibor Eronning yadroviy dasturi hamda Yevropa davlatlari tomonidan BMT Xavfsizlik Kengashi sanksiyalarini tiklashga doir tahdidlar — ya’ni snapback mexanizmini ishga tushirish ehtimoli muhokamasiga qaratiladi.
Bu haqda Eron Tashqi ishlar vazirligi rasmiy vakili Ismoil Bagai haftalik matbuot anjumanida ma’lum qildi.
“22-iyul kuni Tehronda Eron, Xitoy va Rossiya oʻrtasida uch tomonlama uchrashuv boʻlib oʻtadi. Unda yadroviy masala, xususan, sanksiyalarni qayta tiklash bo‘yicha Yevropa tomonidan ilgari surilayotgan tahdidlar asosiy muhokama mavzularidan biri bo‘ladi,” — dedi Bagai.
Mazkur uchrashuv uch davlat o‘rtasidagi strategik hamkorlik doirasidagi muloqotlarning muhim bosqichlaridan biri sifatida baholanmoqda.
