Xitoyda “ishga borishni istamaydiganlar” uchun klinika ochildi
Klinika “depressiya” atamasidan qochib, bemorlar uchun psixologik to‘siqlarni yengillashtiradi.
Xitoyning Xebey provinsiyasida joylashgan integratsiyalashgan tibbiyot markazida noodatiy yo‘nalishda faoliyat yurituvchi “Ishga borishni istamaslikni davolash klinikasi” ochildi. Bu tashabbus jamiyatda katta qiziqish uyg‘otdi va keng muhokamalarga sabab bo‘ldi. Bu haqda South China Morning Post nashri xabar berdi.
G‘arbiy va an’anaviy xitoy tibbiyoti asosida faoliyat yurituvchi klinika kasbiy charchoq, ruhiy tushkunlik, hissiy zo‘riqish va ish faoliyatiga nisbatan ma’no yo‘qligi kabi psixologik holatlar bilan kurashayotgan bemorlarni qabul qilmoqda.
Uyqu va psixologik salomatlik bo‘limi direktori Yue Liminning ma’lum qilishicha, ushbu loyiha maktabga borishni xohlamaydigan bolalar uchun avval ochilgan klinika tajribasidan ilhomlangan. Bolalarining psixologik muammolari yuzasidan murojaat qilgan ota-onalar ko‘p hollarda o‘zlari uchun ham shunga o‘xshash yordam so‘ragan.
Klinika psixologik muammolarga duch kelgan shaxslarga engillik yaratish maqsadida “depressiya” yoki “tashvish” kabi og‘ir tushunchalardan foydalanmaydi. Buning o‘rniga, bemorlarga ochiq muloqot va hissiy yengillik uchun qulay sharoit yaratishga urg‘u beriladi.
Muolajalar dastlab psixologik suhbatlar orqali boshlanadi, shundan so‘ng gipertiroidizm kabi jismoniy kasalliklarni istisno etish maqsadida umumiy tekshiruvlar o‘tkaziladi. Har bir bemor uchun individual terapiya dasturi ishlab chiqiladi.
