Xitoydagi bog‘chada bolalar qo‘rg‘oshindan zaharlandi
Xususiy bog‘chadagi zaharlangan 247 nafar bola kasalxonaga yotqizilgan.
Xitoyning Shensi provinsiyasida joylashgan xususiy bog‘chada 247 nafar bola qo‘rg‘oshin bilan zaharlanib, kasalxonaga yotqizildi. Bu haqda “Sinxua” agentligi xabar berdi. Holat yuzasidan mahalliy rasmiylar tergov ishlarini boshladi.
Bog‘cha rahbari oshpazlarga taomni jozibaliroq ko‘rsatish maqsadida unga bo‘yoq qo‘shishni buyurgan. Ammo qo‘llangan bo‘yoq turlari “iste’mol uchun yaroqsiz” bo‘lib chiqqan. Bu zararli tamlar 2024-yilning may oyidan beri muntazam ishlatilgan.
Zaharlangan bolalardan 234 nafari birinchi davolash bosqichini yakunlab, kasalxonadan chiqarildi. Qolganlari ham shifokorlar nazoratida davolanishni davom ettirmoqda. Bolalarda qo‘rg‘oshin darajasi normadan yuqori bo‘lgani aniqlangan.
Hozirda ish yuzasidan oltita shaxs, jumladan bog‘cha investori, direktori va oshpazlari hibsga olingan. Tergov ishlari davom etmoqda. Mahalliy hokimiyat bunday holatlarning oldini olish uchun nazoratni kuchaytirishini bildirdi.
