Issiq havo va suv tanqisligi Eron hayotini izdan chiqardi
Bir qator viloyatlarda davlat idoralari va banklar vaqtincha yopildi.
22-iyul kuni Eronda keskin issiq havo va energetika inqirozi tufayli bir qator davlat idoralari va banklar o‘z faoliyatini vaqtincha to‘xtatdi. Rasmiy ma’lumotlarga ko‘ra, ayrim hududlarda harorat +50 darajagacha ko‘tarilgan.
“Free Iran” manbasining xabar berishicha, suv va elektr energiyasi taqchilligi g‘ayritabiiy darajadagi jazirama bilan bir vaqtga to‘g‘ri kelib, rasmiylarni shoshilinch choralar ko‘rishga majbur qilgan.
EtemadOnline agentligining yozishicha, bugun Tehron, Xuziston, Kirmonshoh, Markaziy, Siston va Balujiston, Hormozgan, Ilom hamda Qum viloyatlarida barcha davlat muassasalari, banklar va yirik bizneslar yopilgan. Ayrim hududlarda elektr energiyasi soatlab uzilib qolayotgani, ichimlik suvi esa qattiq normaga tushirilgani aytilmoqda.
Mahalliy sog‘liqni saqlash organlari yurak va nafas yo‘llari bilan bog‘liq xastaliklari bor fuqarolarga uyda qolishni, aholini esa soya joylarda bo‘lishni, suyuqlik iste’molini ko‘paytirishni tavsiya qilmoqda. Tez yordam xizmatlari kuchaytirilgan tartibda faoliyat yuritmoqda.
Mutaxassislarning fikricha, bunday ekstremal iqlim holatlari yaqin kelajakda yanada ko‘proq uchrashi mumkin, bu esa iqlim o‘zgarishlari fonida Eron infratuzilmasining zaif nuqtalarini ochiqlab bermoqda.
