Talabalik davrida ota bo‘lgan yoshlar uchun budjetda o‘qish imkoniyati taklif etildi
LDPR rahbari bu tashabbus yosh oilalarni qo‘llab-quvvatlash va ta’lim tengligini ta’minlashga xizmat qilishini bildirdi.
Rossiya Liberal-demokratik partiyasi (LDPR) rahbari Leonid Sluskiy mamlakat Ta’lim va fan vazirligiga murojaat yo‘llab, o‘rta kasb-hunar yoki oliy ta’lim muassasalarida o‘qiyotgan hamda talabalik davrida ota bo‘lgan yoshlarga kontrakt asosida o‘qishdan davlat granti (budjet) asosida o‘qishga o‘tish huquqini berishni taklif qildi.
Murojaatda bu taklif minglab talabalarning ijtimoiy va moliyaviy ahvolini yengillashtirishga xizmat qilishi, ayniqsa yosh oilalarga ta’limda teng imkoniyat yaratishda muhim qadam bo‘lishi qayd etilgan.
“LDPR faqat ona bo‘lgan talabalarga emas, balki ota bo‘lgan yoshlarni ham teng qo‘llab-quvvatlashi lozim. Ular ham o‘qishni bepul davom ettirish imkoniga ega bo‘lishlari kerak”, — deydi Sluskiy.
Hozirda Rossiya qonunchiligida o‘qish vaqtida farzand ko‘rgan ayollargagina bunday imtiyoz taqdim etilgan. Yangi tashabbus qabul qilinsa, bu imtiyozdan yigitlar ham foydalanishlari mumkin bo‘ladi.
Tashabbusning asosiy maqsadi — yosh oilalarni rag‘batlantirish, ta’lim olishdagi moliyaviy to‘siqlarni kamaytirish va ijtimoiy barqarorlikni ta’minlashdan iborat. Masala yuzasidan yakuniy qarorni Rossiya hukumati qabul qiladi.
