Gretsiyada jazirama tufayli ochiq havoda ishlash taqiqlandi
Aholini jazirama ta’siridan himoyalanish uchun konditsionerli maxsus joylar tashkil etilmoqda.
Sweden Herald xabariga ko‘ra, Gretsiyada kuchli issiq tufayli ba’zi hududlarda soat 12:00 dan 17:00 gacha ochiq havoda ishlash vaqtincha taqiqlanmoqda. Bu cheklov poytaxt Afina va mamlakatning boshqa ko‘plab hududlarida qurilish, kuryerlik va qishloq xo‘jaligi sohalarida faoliyat yuritayotganlar uchun amal qiladi.
Issiqlik Gretsiyaning markaziy hududlarida 43 darajaga, yirik shaharlarida esa 40 darajagacha ko‘tarilishi kutilmoqda. Shu munosabat bilan ko‘plab shaharlarda aholiga jazirama ta’siridan himoyalanish uchun konditsionerli maxsus joylar tashkil etilgan.
Shuningdek, Turkiyada ham anomal issiqlik kuzatilmoqda. Mamlakat meteorologiya xizmati ogohlantirishicha, hafta davomida Diyarbakir shahrida harorat 45 darajagacha, sayyohlar orasida mashhur bo‘lgan Antaliyada esa 40 darajagacha yetishi mumkin.
